Kuch kehana tha

Kuch kehana tha…
Paani main rakhe daddu ke daanto se
Khoonti par latke daadi ke baalon se
Baba ke kurte main lage khonte se
Ammi ke zung lage supari ke sarote se
Chutki ki nayi hari-peele chudiyon se
Badki ki puraani kaali jutiyon se
Tai ke pehle safed baal se
Guddu ke us stupid se sawaal se

Kuch kehana tha…

Chachu ki satrangi kameez se
Guddi ki gol gullak ki khereez se
Munshi mama ki kalaave main bandhi kalam se
Tauji ki gud-gud-aati hukke ki chillum se
Kaaka ki mooch main chipki malaai se
Chaachi ki charmaraati chaarpai se
Naani ki nayi paayal ke bade waale ghungroo se
Chuttan ke, gaye saal ramleela main khareede, chotu damroo se

Kuch kehana tha…

Naanu ke, safed dhaage se jode, bhoore ainak se
Mausi ke banaaye mitti ke saanwre sainik se
Andar aangan ke kone main rakhi tulsi se
Bahaar chaukhat ke beech lagi nazariye ki kalsi se
Ghar ke saamne waali gali ke pehle modh se
Gaon ki aakhri baaodi ke doosre chhor se

Kuch kehana tha…
Kehana tha kuch apno se kuch apne aap se
Kuch shabdon main kuch bhaav se
Ke kuch paane ki chaahat main jo choot gaya uski koshish main aaya hoon
Tab Musaafir ho chala tha, par ab ghar laut aaya hoon, ab ghar laut aaaya hoon